19‏/04‏/2010

مين مالوش نفس ؟

مين مالوش نفس .. ؟

ــــــــــ


نفسي اوي اني اتخرج من الكلية و اعمل جورنال و ابقي رئيسة التحرير و اشغل ناس معايا بعتبرهم من اروع من مسكوا الأقلام ..

هسميه جورنال " الضحكة "..



نفسي اوي اتجوز واحد طيب .. يهتم بيّا وقت حزني .. يهتم اهتمام غير عادي ..

يبعتلي ماسيج نكتة مثلا عشان اضحك رغم انه في الاوضة و انا في المطبخ .. و ده اللي هيضحكني مش الماسيج .. !!
يبقي مشغول البالي اوي بإن انا متدايقة و وقت فرحي يبقي حد مختلف ..
حد يتحب بجد اوي ..
و أهم حاجة انه يحسسني بالأمان اوي ..
لو فه القدرة دي هيبقي يجنن بجد ..
ربنا يحفظه ليا :)


نفسي اوي يبقي عندي مزرعة بطيخ .. و مصنع ايس كريم ..

و النتجات ليست للبيع .. !!


نفسي اوي في " رملة × بحر " .. نفسي اوي تيجي بقي عشان العمر بجد بيمضي ..



نفسي في بيت بسلم من جوا ..

مش فيلا و لا قصر ..
لا عايزه بيت زي بتوع الامريكان كده .. اللي سقفه مثلث .. و له حديقة ..
و فيه حمام سباحة ..
و مرجيحة بتاعتي لوحدي .. مش هركب عليها حد غيري ..


نفسي اوي اسافر الامارات ..مش لازم اعيش فيها ..

بس عايزه اروح اتفرج ..


نفسي اوي اركب عربية بالليل .. و اكون قاعدة ورا جنب الشباك .. و مكنش انا اللي بسوق ..

و العربية ماشية في طريق طووووووووووووووييل و فاااااااااااااااااااضي و بسرعه جدااااااااااااااااااااا .. و الجو فيه برد طعمه حلو كده ..


نفسي اوي احفظ و ارتل القرءان كله ..



نفسي اوي احقق حلم العمارتين اللي فاكره قصتهم لحد دلوقتي .. و برضه هخليهم ببلاش ..



نفسي اوووووووي اشيل الحزن من كل الناس ..



نفسي اووووووووووي يبقي عندي تأكده تام ان ربنا راضي عني ..



نفسي اووووووووي ارجع اعيش في المدينة المنورة تاني .. و افضل فيها لحد ما اموت ..

بس اتدفن في مصر ..!!


نفسي اوي اعرف انام بسرعة .. مش بعد ما ابدأ احاول انام بساعتين ..!!



نفسي اوي اخلص من ناس كتير دخلوا حياتي ..



نفسي اوي اقابل شخصية معينة و نقعد نفتكر أيام زمان و نحكي الحياة عملت فينا ايه و نضحك زي زمان ..

"بقالنا اد ايه مضحكناش سوا .. ؟؟ بقالنا اد ايه متكلمناش .. ؟؟ سنه ..!! .. و عندي عالفيس بوك ..؟!!"


نفسي اوووي اطلع القمر مع شخصية واحد بس منزهأش من بعض ..



نفسي اوي اخلف 3 ولاد .. و بنتين ..




نفسي اوي يبقي عندي شاليه في وسط النيل




نفسي اوي احرر القدس بنفسي .. و لوحدي ..




نفسي اوي اشتغل زي "حنان ترك " في فيلم "تيتو ......" بجد نفسي في دي اووووووووووي"



نفسي اموت وانا صايمة .. و يارب اكون بصلي لحظتها كمان في الحرام .. لالا جوا الكعبة .. الله !



نفسي ادخل الجنة







نفسي كل اللي نفسي فيه يتحقق .. ..


و لسه ..



Saturday, October 11, 2008 at 11:07am

هناك تعليق واحد:

غير معرف يقول...

ربنا يحقق لك كل أحلامك.. :)