و مازلت بحب برضه حاجات كتيرة أوي

بحب سورة مريم اووووووي ..


بحب "بعشق" المدينة المنورة "..


بحب جمال عبد الناصر اوي الله يرحمه و بكره محاولة البعض تشويه صورته قدامي ..


بحب الاغاني الوطنية بالذات اغاني حليم .. أصلا حليم مالوش حل في جميع اغانيه .. ناصر يا حرية يا وطنية ياروح الامه العربية يا نااااااااااااااصر ..اه ناصر دايما مرتبط معايا بحليم ..


بحب البطيخ اووووووووووووووووي ..


بحب عمر اخويا لما يكون مهييس و بحبه اوي لما يبوس راسي رغم اني اوقات ببقي مخنوقة فاتغابي عليه .. و بحبه اوي لما يرخم عليا بس لما بيزيد بوريه الوش التاني ..


بحب شمس الأصيل ..


بحب التمشية لوحدي في عباس العقاد ..


بحب الايس كريم اوي و بالذات بتاع "قويدر" اللي مبقاش يتعمل منه بسكوت دلوقتي للاسف ..


بحب " أحلي حاجة فيكي لـــحماقي" ..


بحب العسيلي بجميع اغانيه .. مهيسة او بتوجع ..


بحب اعمل لأبي العشا ..


بحب الورقة و القلم اوووووووووووي و من أحلي الهدايا اللي جاتلي اوتجراف من واحدة بجد من أغلي الناس لقلبي .. واحدة بعد اذنها بعتبرها "انا " في حجات كتير اوي ..


بحب ماسيجات بالليل ..


بحب رنات الصبح بدري اوي دي .. لما اكون صاحية الساعه 6 عشان عندي امتحان ..


بحب تليفون بيجيلي كل فترة من برا عشان يبقي السؤال : عامله ايه .. ؟ .. نفسويتك ايه .. ؟ فلو كنت في الحضيض مبقدرش غير اني اكون سعيدة اوي ..


بحب البلاليين اوي .. و اكتشفت حبي ليها متأخر .. و من اروع الهدايا اللي جاتلي برضه كانت علبة بلاليين .. و اكتشفت ان من أحلي الألوان في البلاليين "اللون البني " .. و البلونة عندي يعني لازم تكون منفوخة جامد اوي .. و مش بتقعد غير كام دقيقة و تنفجر ..


بحب البلاليين الهليوم اووووي برضه ..



بحب كلمة " حمدا الله عالسلامة " اللي اتقالتي مرة من واحدة رغم اني مكنتش مسافرة .. !!


بحب العياط اوي ..



و بحب "لحد العشق" الضحك .. اووووووووووي ..


بحب الحليب و شويبس ليمون صودا و الميّه طبعا ..



بحب اكتب بالليل قبل النوم بيجي في عقلي كلام كتير .. فالموبايل بيبقي احلي صحب ساعتها ..


بحب العسيلي لما يقول " لا ملك مدينة ولا ناس و لازينة يبعدوني عنك .. لقمة تكفينا و موجة تودينا علي شط مليان حبك "..


بحب البلكونة بالليل اوي و الجو برد .. وبحب الصيف اكتر من الشتا ..


بحب العين اوي ..


بحب الــ لكلوك .. وعايزه اجيب واحد علي شكل معين ..


بحب القطط اوي رغم اني بخاف شويه او مش متعودة اقرب منهم ..


بحب اوي الباص بالليل وانا جنب الشباك و الجو حلو ..


بحب انزل اعمل شوبنج لوحدي .. !


بحب اروح من البيت للكليه او من الكليه للبيت لوحدي ..


بحب اوي اقري نوت لناس معينة و اوقات بعيط بسببها .. !


بحب اوي وجود ناس معينة في حياتي .. بحس اني صعب ازهق منهم ..


بحب الاهتمام بيا اوي ..


بحب المصلي اللي في سيتي ستارز .. بحس بالراحه فيه و الهدووووووء ..


بحب حسام حبيب لما يقول " نسيت الناس معاك انت .. حبيبي الدنيا وانا جنبك عليّا تهون " ..


بحب توم هانكس العبقري ..


بحب احلي فيلم

YOU’VE GOT MAIL
رغم انه بسيط اوي .. بس عميق اوي بالنسبه ليا




بحب اقعد لوحدي كتيييييييير ..


بحب لو عايزه انجز حجات كتير يبقي اللي معايا خفيف الحركة و الفهم او انجزها لوحدي عشان بجد اوقات بيبقي لازم نخلص ..


بحب دفا البطانية أوي ..


بحب اللون الأحمر .. و مؤخرا بقيت احب الأسود ..


بحب ان الناس تختارني انا عشان تبوح عندي .. حتي لو حالتي النفسية زي الزفت .. ببقي مبسوطة اوي ..


بحب مامي لما تقلي " قطتي .. قطة .. لولا " .. و أبي لما يقلي "لولّا "..و هبه لما تقولي "لؤلؤة " ..


بحب خالو لما نقعد نرخم علي بعض .. بس لما بيزودها بتخنق ..


بحب الملوخية و الرقاق و اللحمة و الفراخ اوي ..و الجبنة الــ لافشكيري اوي ..


بحب السفر اوي في الفترة الاخيرة ..


بحب الناس تعبر عن حبها .. صح ..


بحب صلاة العيد اووووي .. بحب وقت الفجر بتاع العيد ..


بحب الصيام اوووووي .. من احب العبادات لقلبي الحمدلله كلها محببة ..


بحب شرين لما تقول " امنتك عليا عشان لقتني مصدقاك " ..


بحب اغنية اصالة بتاعت "خليها علي الله " ..


بحب التهييس اوي ..


بحب لما اضحك .. اضحك من القلب اوي ..


بحب اتعامل مع ناس مبسوطة .. مش احس ان جواهم ازمة .. بسترخم اوي كده ..


بحب حد لما يلقي " انتِ بخير ..؟ " ..


بحب الاطفال اوي .. عندي صور كتير ليهم ..


بحب اعرف الناس اللي انا بحبهم علي بعض ..


بحب نفسي اوي لما اقول من جوايا اوي وقت الفجر و انا باصه للسما " يــــــــــــــــــــــارب

" ..


بحب واحده صحبتي اوي رغم ان تعاملنا قليل اوي الا انها " بتحبني بجد" .. !!


بحب اي حد يبقي داخلين اوفلاين عالماسنجر و يكلموني ..


بحب اوي الرسايل الخاصة و بحب ماسيجات معينة في حياتي حطاها في فولدر عالموبايل عشان اوقات بتبقي دواء يخليني اعدي اوي لناس ..


بحب اوي الناس تبقي ليهم رصيد حسنات عندي .. بيجبروني اني احبهم .. و اغفر ..

بحب اني احس بالأمان اوي ..

و مازلت بحب حجات كتير اوي ..

Wednesday, October 8, 2008 at 8:05pm