ميّه ..

عارف ان الزرع بيدبل .. لازمله ميّه تسقيه ..
الميّه أهم من اي عنصر تاني لجل يعيش الزرع ..
حتي ربك بيقول "وَجَعَلْنَا مِنَ الْمَاء كُلَّ شَيْءٍ حَيٍّ " ..
يعني حتي البشر لازم ميّه ..
لازم يتبل ريقهم ..

حاجة كمان .. الدموع اللي هي برضه ميّه .. حياة للانسان .. فرق كبير بين انسان مخنوق بالقوي قبل ما يعيط ميّه و بعد العياط ..
موت و حياة ..

الجفاف وحش ..
حتي في تعاملنا كبشر جفاف التعامل بيقتل ..
لازم طراوة بين الناس ..

هقول من تاني " الناس وحشة " .. من وجهة نظري و مش حابه اتناقش في محاولة لتغييرها ..
ولا بحب خد يستهزأ بوجهة نظري حتي لو طمع في تغييرها ..

الزرع في بلكونتنا .. علي سورها بدأ يدبل ..
نام عالحواف و بدأ يتكسر ..
يمكن هلك من كتر قعدته ساكن كده عالشارع بيتفرج كل يوم .. نهار و ليل عالبشر ..
و يعدي حد فينا كل فترة يبصله ..
يدلق شويه ميّه ..
مش يمكن بيحتاج في الصيف تكون ساقعه .. ؟ .. و في الشتا ندفهاله .. ؟؟


الزرع راضي .. و مش ناوي في يوم يعلق علي أفعال بشر ..
مستني مصيره هيترمي علي سور البلكونة .. يملاه التراب .. و تتشقق تربته ..
بس علي الأقل لا هو بقي طايل يبص من فوق علبته علي الناس ..
و لا حد بقي يهتم يجي كل فترة يرميه بشويه ميّه ..
تجبره علي الحياة ..