الناس .. ما بين الوحش و الحلو ..

الانسان .. الطفل .. بيتولد علي الفطرة ..
و الفطرة هي الاسلام ..
يعني الانسان بيتولد علي شئ من أطهر الأشياء..
يعني في الاصل الانسان كويس ..
حد جميل جدا..
يمكن عشان كده الاطفال بيتقال عليهم ملايكة ..

و ربنا قال "انا خلقنا الانسان في كبد "
.. يعني الطبيعي ان الانسان حياته تكون شاقة .. و يمكن ده لازم عشان يبان هو هيتصرف ازاي في المشقة .. فلو اتصرف صح كانت الجنة حقه و مقامه الاخير ان شاء الله ..

احنا بشر ..
اختلفنا عن الملايكة باننا بشر بنغلط ..
و اتميزنا عن الشياطين اننا مش فسدة لأبعد الحدود ..

يعني احنا زي دين الاسلام - طبعا مع فارق التشبيه و الاحترام للاسلام- بس احنا وسطيين .. في النص ..

الانسان وحش ولا حلو ..؟!
أصل الانسان اللي هو الطفل .. اللي هو علي الفطرة هو كويس و حلو اوي .. هو ملاك زي ما بنقول ..
لما يبدأ الانسان يكبر و يتعامل مع الناس اللى حواليه و يغلط و اللى حواليه يغلطوا ..هنا بيبدأ الانسان يمر بطوره الطبيعي جدا و يبدأ يتحول للوسطية.. و يمكن اللي ربنا بيرحمهم برحمته لما بيكبروا و يعجزوا بيرجعوا لطور الملائكية من تاني ..

يبقي عندنا أهم مرحلة في حياة الانسان .. اللى هي الوسطية ..
بيبقي الانسان ما بين وحش و حلو ..

امممم الناس وحشة... يمكن ده بيبقي تفكيري معظم الوقت .. يمكن عشان انا سيئة الظن بالناس .. و يمكن انا فعليا اتعاملت مع ناس وحشة كتير و بمبدأ "السيئة تعم" " اللي هو مبدأ خطأ أصلا بس لان اتفقنا ان فيه جنب وحش " فبنشوف كل الناس وحشة ..


بس فيه ناس طيبة ..
أكيد فيه..
بس يمكن قلة اوي .. او يمكن اتطحنوا في دوامة الوحشيين ..
مش عارفه ..

فيه ناس بتحب بجد ..
أكيد فيه..
بس ايه حدود المحبة دي ..؟؟
ايه أقصى مدى ممكن توصل ليه ..؟؟

اكتشفت ان الناس القريبة نوعا ما مني مش اعرف عنهم حاجة ..
بيقولوا "الحب أعمي" .. و عشان برضه فيه الجانب الوحش .. فبنستخدم المقولة دي حجة لتبرير اخطائنا.. و يمكن عشان القريبين شويه دول بيحبونا فبنشوفهم حلويين .. و مش شايفين الجانب الوحش اللى ممكن اوى يكون فيهم .. بس عشان احنا مش نعرف كل حاجة عن حياتنا فلما نبدأ نعرف شويه نبدأ نشوف الجانب الوحش ..

الوحاشة عموما ليها مقياس يختلف من واحد للتاني أكيد ..
و زي ما مش كل اللي بنشوفه بيضحك بيبقي جواه فرحان .. فمش كل اللى بنشوفه فى البداية حلو يبقي جواه او حتى براه مش وحش ..

ـــــــــــــــــــــــــــــــــــــــ

الواحد محتاج يخرج من مرحلة الوسطية و يرحل للملائكية .. أكيد هيبقي مستريح أكتر ..
علي الاقل يوقف شويه ظلم في خلق الله ..

و في نفسه ..!!