اتصور .. مش لازم الصورة تطلع حلوة ..

لحد دلوقتي مش عارفه هي الصور دي حاجه جميله ولا لا؟

زمان مكنتش بحب التصوير ابدا..

فاكره اني في مره حد كان صورني لما اخدت الصور قطعتها.. و بندم دلوقتي بندم.. لان الصور دي هي الحاجه التانيه اللي بتفكرني بناس للاسف فقدتهم غير ذكرياتي عن حياتي معاهم..

دلوقتي بقيت اتصور كتير.. مش مهم بكون بضحك في الصور .. مش مهم ان الصوره تبقي حلوه.. ممكن تبقي صوره ليا و انا بضحك جامد.. و انا باصه في حته تانيه بعيد عن عدسه الكاميرا.. و انا بعيط.. و انا مش اخده بالي اني بتصور.. و انا واقفه.. و انا بعمل اي حاجه..

بقي عندي صور كتير ليا و لاصحابي.. كل فتره افتحهم و اقعد اتفرج.. و ابتسم في هدوء.. ابتسم ابتسامه .. رضا.. حزن.. سعاده.. افتقاد يمكن..

ناس كتير اوي مشيوا.. كان نفسي اوي يبقي ليا معاهم صوره لما اشوفها افتكر لحظة الصوره كان ايه الموقف؟.. كنا بنضحك جامد هنا ليه؟!...

نفسي اوي اتصور صوره و انا بهزر مع حد .. صوره تلقائيه.. صوره من بعيد.. نفسي اوي اتصور صوره و انا بلمس البحر بايدي..

نفسي اوي اكون واقفه في صوره حواليا كل الناس اللي بحبهم سواء موجودين حواليا دلوقتي ولا لا..

نفسي اتصور جوا الكعبه..

اتصور في بيتنا اللي كان في المدينه المنوره..

اتصور و انا و اخواتي بنلعب في الصاله في شقة السعوديه.. و احنا بنجري ورا بعض..

اتصور و انا واقعه عالسرير و عمر عمال يضرب فيا و انا بضحك..

نفسي اوي اعمل صوره كبييييييييييييييييرة احط فيها صور كل الناس اللي عرفتهم و تحت كل صوره امضاء باسم الناس دي..

نفسي اتصور وانا قاعده في نص الشارع..

و انا بجري تحت المطره..

و انا بلعب في الرمله في الصحرا..

و انا بقول لابي " تشرب حاجه؟"

و انا خالو بيرخم عليا و انا ارد عليه برخامه زيه..

و انا مامي بتقولي " يا قطه".. و انا بضحك..

كان نفسي اوي في صوره ليا اول يوم العيد و انا قايمه من النوم و مش فايقه و مسترخمه اليوم و فجأه بعت ماسيج و اترد عليا بماسيج فوقتني اوي..

و صوره و انا بعدها قمت بنشاط اوي و جريت بسرعه و نطيت السلالم و دخلت علي ابي و مامي و قلتلهم " صباح الخيييييير" بضحكة و فرحه..

و صوره ليا انا و صاحبتي و احنا قاعدين في المسجد و صحبتي بتقعد تزق فيا و تقولي مافيش مكان و تقعد تزنق عليا و بنضحك سوا..

صوره ليا و ليكي و انتي بتحضنيني اوي..

صوره ليا و انتي بتبصي في عيني جامد.. كانت هتبقي صوره حلوه علي فكره..

صور صور صور...

ناس كتييييييييييير و اماكن كتييييييييييييييير...

ذكريات حلوه اوي..

شايفه صورة البحر بتطلع موجه عاليه اوي تغطي القمر و انا واقفه هناك قدام البحر عالشط بضحك و حواليا اصحابي و صوره كبيره اوي..

اوي !!