محاولة جادة لأكون أحد غيري ..

محاولة جادة لكبت اي توتر أو عصبية أو زعل أو ضيق أو اختناق أو غبا أو تخلف أو سذاجة ..

..

في الفترة الأخيرة - اللي هي من بداية الأجازة تقريبا - و انا مقضية الأجازة لوحدي ..
بصحي الصبح بدري اخري الساعة 10 يعني .. و اقعد في أوضتي .. ياما نت ياما تليفزيون اللي عادة بيبقي مسلسلات أجنبية لحد ما خلاص الواحد مستعد يسمع اسم كل مسلسل و أحداثه ..

مش حلو علي فكرة ..

قعدة مش لذيذة نهائيا .. قعدة بدأت تخلي الواحد مش عايز تواجد لاي حد تاني حواليه .. شويه بشويه بقي الخروج حاجة مملة .. بقيت اهرب منه .. بقيت اقول هاخرج و اتفق .. و في ميعاد الخروجة اكنسل بماسيج بسيطة .. و لو مقررة انزل اقص شعري ولا اشتري حجات اقول هنزل النهارده .. و منزلش ..

كان التوتر مسيطر جدا علي دماغي الفترة اللي فاتت ..و مازال برضه بس يمكن خف شويه لما اتطمن علي اني الحمدلله اللي عيزاه اتحقق و دخلت القسم اللي انا حباه " الصحافة " ..

بس اكتشفت اني بقيت عصبية زيادة عن اللزوم .. رغم اني دايما عصبية ..
حساسة زيادة عن اللزوم .. رغم اني دايما حساسة ..


مش طايقة الناس زيادة عن اللزوم و عايزاهم بعيد .. رغم اني مكنتش كده زمان ..
و ده يمكن الجديد الوحيد اللي في أجازتي .. غير نتيجة الكلية و نتيجة تنسيق الأقسام الحمدلله يعني ..


بس القعدة الكتير لوحدي خلتني افكر في التغير ..
هل أنا كويسة ..؟؟
لا و ألف لا ..
لا اوي ..
لا ابدا ..
لا خالص ..


هل انا نقية ..؟؟
لا طبعا .. نقاء ايه و صفاء ايه بس ..

هل انا وحشة ..؟؟
اه اكيد .. الانسان اللي عنده قدرة علي ايذاء الناس و لو بحرف واحد يبقي وحش و ستين وحش ..

محاولة كبت الحجات اللي فوق دي لازم تتم بصورة سريعة .. بجد الجد يعني ..
لازم اعادة هيكلة لـــ "انا" .. و لازم انعزالية صغنتوتة اوي ..

عشان علاقات الناس ببعض تتصلح لازم كل انسان يعرف قيمة الانسان اللي بيتعامل معاه ..

انا بحب نفسي علي فكرة و دي مش حاجة خجلانة او بخجل منها .. لان عشان اعرف احب الناس لازم احب نفسي الأول ..
و عشان احاول يمكن اصلح القريبين مني .. اصلح عيوبهم اللي انا شيفاها يعني لازم ابدأ اصلح عيوبي انا ..


لازم اضم ايدي كل ايد لوحدها اوي و اهدي جدا ..
يمكن انجح في التغيير..


امممم ..

بس ..