مطر .. وعصفور مطرود ارتعش ..

مطر ..
وعصفور ارتعش ..
و من ايديكي الطيبة طلب الأمان ..
ايوه بحبك ..
اه بحبك من زمان ..
يا صاحبة القلب الرقيق ..
خبيني من مطر الطريق ..
عصفور انا ..
عصفور أنا ..
طردوني من كل الشجر ..

خديني في عش الحنان ..
ونشفي شعر الجناح من المطر ..

ليل بعد ليل ..
ونجم ورا نجم اتحدف ..
و انا بغني لكن لوحدي للاسف ..

لحني الجميل مش لاقي انسان يسمعه ..
ياريته ما اتغني ..
ياريته ما اتعزف ..


ازاي اغني للربيع تحت المطر ..


مطر / للرائع علي الحجار




ــــــــــــــــــــــــــ

ـــــــــــــــــــــ






الاغنية رائعة بجد ..
اول ما سمعتها امبارح شدتني جملة " عصفور انا .. طردوني من كل الشجر" ..
هي دي اللي خلتني افوق ان فيه أغنية جنبي مفتوحة .. فيه حاجة بسمعها ..

و رجعت بالليل أول ما قعدت عالنت اول حاجة جبتها عشان اسمعها و اركز فيها جامد ..


يعني كل اما احاول اقول دي احلي جمله في الاغنية الاقي جملة تانية بتبهرني بزيادة ..


مجرد التركيز في كل حته في الاغنية ..

تتسمع و الواحد مغمض عينيه ..
فيشوف المطر بيننزل ..
و ادي العصفور الاصفر الصغير بيرتعش ..ارتعش .. بس رعشة مفاجئة سريعة مؤلمة ..
بنوتة حلوة حس في ايديها هيلاقي الامان ..
بيطلب منها تخبيه من مطر الطريق ..

"في رأي المطر هو رصاص الناس .. الناس " ..

العصفور الحزين طردوه ..
من كل الشجر ..
كل ما يجي يقف علي شجرة يطردوه ..
يحدفوه بالطوب ..
بالرصاص ..

بقطرات المطر ..

بيغني ..
مهما طردوه بيغني ..
بس صوته الجميل .. روحه البريئة اللي كلها في زقزقة ..
بيغني .. اه بيغني .. بس لوحده .. اوحده اوي .. طول الليل لوحده .. ليل ورا ليل ..
محدش بيسمعه ..

وصل بيه اليأس انه يتمني ان ياريته ما اهتم بانه يغني ..
ياريت لحنه الرائع ما اتعزف ..

و لسه ..

مطر ..
و عصفور مطرود بيرتعش ..


ــــــــــــــــــــــــــ ـــــــــــــــــ

متغنيش يا عصفوري ..
و متستخباش بين الشجر ..
طير..

خليك حر ..
طير فوق اوووووووووووووي ..

حاول تتفادي المطر ..
و عيش ..


يمكن توصل فوق للقمر ..
تلاقي صاحبة القلب الرقيق ..
بعيد عن المطر ..



مطر ..